২০ জুলাইৰ পৰা ১৩ আগষ্টলৈ অনুষ্ঠিত হ’ব সংসদৰ বৰ্ষাকালীন অধিৱেশন।
শনিবাৰে এই কথা প্ৰকাশ কৰে কেন্দ্ৰীয় সংসদীয় পৰিক্ৰমা মন্ত্ৰী কিৰেণ ৰিজিজুৱে।
সামাজিক মাধ্যম এক্স প’ষ্টত ৰিজিজুৱে কয়, “ভাৰত চৰকাৰৰ পৰামৰ্শ মতে মাননীয় ৰাষ্ট্ৰপতি দ্ৰৌপদী মুৰ্মুৱে ২০২৬ বৰ্ষৰ সংসদৰ বৰ্ষাকালীন অধিৱেশনৰ বাবে সংসদৰ দুয়োখন সদনৰ বৈঠকত অনুমোদন জনাইছে । এই অধিৱেশন ২০ জুলাইৰ পৰা আৰম্ভ হ’ব আৰু ১৩ আগষ্টলৈকে চলিব । এই অধিৱেশনত অৰ্থপূৰ্ণ বিতৰ্ক, আলোচনা আৰু ৰাষ্ট্ৰীয় গুৰুত্বপূৰ্ণ বিষয়সমূহৰ ওপৰত সিদ্ধান্ত গ্ৰহণ কৰা হ’ব ।”
উল্লেখ্য যে সংসদৰ অধিৱেশনৰ পূৰ্বে কেইবাখনো সংসদীয় সমিতিৰ বৈঠক অনুষ্ঠিত হৈছিল । ইফালে, বিতৰ্কিত ১৩০ সংখ্যক সংবিধান সংশোধনী বিধেয়কখন পৰীক্ষা কৰি থকা যুটীয়া সংসদীয় সমিতিয়ে (জেপিচি) ১৭ জুলাইত নিজৰ প্ৰতিবেদনত অনুমোদন জনোৱাৰ সম্ভাৱনা আছে । এই প্ৰতিবেদন সন্দৰ্ভত ইংগিত পোৱা গৈছে যে গুৰুতৰ অপৰাধৰ সৈতে জড়িত গোচৰত গ্ৰেপ্তাৰ হোৱা আৰু একেৰাহে ৩০ দিনৰ ন্যায়িক জিম্মাত থকাৰ ক্ষেত্ৰত প্ৰধানমন্ত্ৰী, মুখ্যমন্ত্ৰী আৰু কেন্দ্ৰীয় বা ৰাজ্যিক মন্ত্ৰীসকলক স্বয়ংক্ৰিয়ভাৱে নিজৰ পদৰ পৰা অপসাৰণ কৰাটো বাধ্যতামূলক কৰাৰ দৰে বিধেয়কখনৰ আটাইতকৈ বিতৰ্কিত বিধানটো বাহাল ৰাখিব ।